رسائل المهبول و القول المزجول جولة خيالية

**سعيد** الإثنين 17 نوفمبر - 12:25

أنا و مراثي و الكاورية

هدية مني لكم و عيد مبارك سعيد*

أنا و مراثي و الكاورية في جولة خيالية
تصوير و واقعية
1-أولا و قبل كل شيء التعريف بالهوية
زجال فقير مهجور
كاتب نصوص زجلية
فنان زغبي مغمور
في الكملة و الميزيرية
نحكي على حبي مضرور
امرأة مروكية
مزوج بدينصور
و عند بالي حدية
ظنتها عصفورة في قفص عصفور
و هي لبية
جدرة في صيفة الخبور
و لا يني هية
جبتها من غابة الكنتور
أصلها كركورية
النكير قبل الفطور
المرأة عيشورية
عرست في لعاشور
و في شيعوا علمت بالحمولية
ما بين الدور و الدور
توحم صباح و تنفس عشية
حتى و لينا جار و مجرور
عاد بغات ترجع عصرية
مشى زمان الزيزوة و البابور
و مشى عجين القصرية
هاو بدات علية بشي هدور
ديال المسلسلات المكسيكية
كثر الرجاء و ما بقا عندي مدخور
و حتى الساكن تلف علية
لا دقيق لا بدور
لا بيصارة لا قطنية
قلت مع راسي نمشي على الخدمة ندور
و ما نبقاش نبيع حوايجي في الجوطية
ظليت طول النهار نتور كيف الموتور
لداري خاوي رحت في العشية
لقيت مراتي كيف المسعور
بالنكير زادت ما بية
واش بغيتي تتزوج غا فابور
و تعيش المرأة في الميزيرية
دير ما دار جارك قدور
مول الكرا ء عاد دقدق علي
سير بيع الد يطاي أ و رجع سيرور
و قنع بالقسمية
دور تصور الفطور
الرأس اللي ما يدور كدية
و سارت علي بشي هدور
كثر من المرة الأولانية
إلى بقيت حداها غادي نتور
الله هم نمشي نتكى شوية
تعشيت خبيز و أتاي و 10 حرور
و حطيت راسي على الخدية
حتى صباطي عجزت نزول ليه السيور
بات غير في رجلي
صوبت فيزة و باصبور
و سافرت لدولة أروبية
خدمت عام و ست شهور
و تزوجت كاورية
السيارة كولف سبور
و البلاكة بلجيكية
في الكونجي درت الروتور
مع الجالية المغربية
الكرافان مجرورة اللور
و السلعة برانية
في طنجة و سط البور
السيارة سخنات لية
تريت الكابو نقلب الرادياتور
الماء طايب طار علية
جيت نتسوخر اللور
طحت من فوق النموسية
بايت غير في فراشي كندور
و هاداك غير بول ولادي ترش علية
فقت على النبور
ما لقيت قدامي ها نكير العربية
العشرة هادي و انت باقي تشخر
نوض خرج علية
لا كنت معكس أ و مسحور
زور لالة عائشة البحرية
زور تنور
و دي شمعة صباحية
سير للجديدة و أزمور
في العاصمة الدكالية
دير حجاب أو بخر بخور
و سعف ري الشوافة الكناوية
مالك قارئ الزابور
و علاش ما فيكش النية
الهدرة و لات معيور
و كلت الله على اللي زوجوها لي
الناس القدام و أنا غير اللور اللور
عانخدم و نطلق التابعة علي
الله يقاد الأمور
الشواري و البردعة مكفية
موكة واخضة شحرور
من الأوهام ليدام و الخبزة حرفية
نخرج للموقف ديال منصور
فيه ندير شي بياخية
كيجوه رموكات الرملة و الياجور
معاهم ندير شي سلة مسمارية
نغامر و نقطع سبع بحور
و ما نرجعش لديك الجنية
جيت لجنب السور
في ديك الغبشية
بركت نادم محسور
إدي على حناكي و راسي بين رجلي
جاء عندي واحد الغندور
لابس دراعية
قال تخدم عندي شيفور
في دولة عربية
ها البيي ألي روتور
من المغرب إلى السعودية
مشيت معاه الجدة مبشور
و قلت تحققات الأمنية
هنا نبقا حتى يفنا العمور
و ننسى ديك الرهبانية
نخدم و نلم و ندير جوج ديور
و نتزوج بشي شرقية
من بعيد تشم ريحة العطور
و الذهب عندها قسارية
باها رجل أعمال مشهور
و أمها دبلوماسية
أخوها بطل كسكدور
و هي ممثلة سينمائية
نكتب ليها جوج سطور
و نألف مسرحية
باقي كندمر في المدمور
غاتا ضربتني طوبية
لقيت راسي ناعس على كركور
و ياجورة هي الخدية
ضال في الشمس منشور
و كلب العساس كيلعق في
فراشي الأرض و غطاي شي أخر
و هي زربية
فقت و رجعت الداري مضرور
الجيب خاوي ها يدية
عادخلت و كدمتني كيف الثور
كشرت نيابها و شنقت علية
خليتنا لا غدا لا فطور
حتى خروق الدراري سلاوا علية
اللعبة الأولى فابر
و الثانية هدية
الثالثة ساطور
و الرابعة تافنية
غرني الغرور
هادا حالي بيطالي مقهور و طمع الدنيا
و الوقت تالفة بية
نبات خدام و نصبح شومور
عايش غير في الأحلام الخيالي
جريدة بلا ماء قالوا جنان الحبور
و المقابلة ودية
باقة ورد و زهور
في لوحة تشكيلية
هي مني هدية للجالية المغربية

--إنتباه-- ،إن بعض الحروف ناقصة من النقط مثل ك بثلاث نقط من الفوق
الكاورية بثلاث نقط المقصود منها النصرانية
كدمتني-بثلاث نقط المقصود منها صدمتني
و كدالك الشكل لأن الزجل هو دارجة يلزمه الشكل أو أن يكون صوتي