درت دواية وقلم

درت دواية و قلم
و سطرت سطري
بايت طول الليل نخمم
و آنفذ صبري
لا حد لقيت ثم
و علاش نبري
عندمن حب الفهم
و شكون يدري
علامن نفاجي الهم
و لمن نفشي سري
سألوا الشيخ و المقدم
واش قرميم عزري
تسع نساء فاتوا ثم
و إثنى عشر ديال الدراري
بلا ما نحلف و نقسم
بحثوا تلقاوا آخباري
ما بقى عندي ما نلم
على هاد الورقة و هاد القلم
بعت غطى و فراش وسادة و سداري و بقيت بلا دراري
مدمن مريض يا مسلم
عايش غير بليباري
كلشي اليوم بالدرهم
المعارف و المداري
العريان خصو خاتم
و المكسي في السماء دار سواري
البنيان اللي بنيتو تهدم
و طاحوا لي الكواري
عشت الحكرة و الظلم
و العبار يوزن آعباري
الطلبة دارو لي رشم
في طريقي لقاوا الحفاري
ناس المراية و الدراية و الرسم
في الحيوط نقشوا الكساري
و أنا عايش غير كنقمقم
مخدامش و كاري
بغيت نبيع الكلوة و الدم
و ما لقيتش الشاري
كلشي عند الله مزمم
و أنا راضي بقدري
قبل نختم نسلم
و نراجع آسطاري
شكون يغسل ظيمي و شكون ينفظ آغباري
-----------------------
وووواااااااخيييييي
ماكاين علاش تخمم
كلشي فلوح لقضا مزمم
بهذا الزمان من زمان تكلم
ما كاين علاش تتألم
مع الوضع لابد تتأقلم
مانت وحدك تعاني..
ولا وحدك مجروح
عيشك بالشقا تسمم
ولا وحدك تبكي وتنوح ..
سعدك مذبوح .
ثوبك ما يترمم
غير سير وكان
كلشي ياقرميم علينا مزمم
--------------------------
شكرا لك أخي المصطفى كووار على تفاعلك مع القصيدة
ما كاين لاش نتألم و مع الوضع لابد نتأقلم
نصبر للحكم
و القدر آقضى و زمم
شكرا لك أخي عن المرور الطيب
---------------------
رْثيتْ لـحْوالك ..وانتَ قُلْ اللهُ أعلم
وما عْليك غير تْزيد ف الصّبر وتْداري
وما لـمْتك ف حالك واخّاَ بيديك تْزمّْم
وحتَّاناعندي حقي وماجايب حدّْ خْباري
شادّْ عْصابـي ومبرّد ومْثلّج الـــدّم
جاغم الـمرّْ بعد حْلاوْة بُوالزّْرايْر ولعْذاري
-
بالطُّوب لهبيل بْنيتـي حيطك ومعلوم يتعرّْم
لَو عمّْقتـي السَّاس ما يتْحشُّو ليك سْواري
لَوْ كنْتـي البارح بْعقل اليوم كٌَاع ما تندم
وْما تشكي بـهْموم شرّْباتْك كاس شبَّاري
-
فْهامْتـي قْليلة وانْتَ مول لعقل ولفهـــم
جايْل وْصايل ومْجرّب وْمفقّه وْ قــاري
وعلاش كَتسوّْل عْلى مْن عندو حْبّْ لفهـم
وْما هَوَ كينا أو عشبة رايْجَة بين بايع وشاري
وْ لو كان حبّْ لفهم ينفع ما يْكوّْرُو لبْكـم
ما يتبردع ، ما يتحلّس وْ ما يْهزّ شْــواري
ما يْكون مشَّاي والزّمان طْويل والطريق مْظلّم
ما يصبر لعْصا ما ياكلْ فصَّا ما ينغزوه دْراري
وقبل ما نْخْتم الخير والشر اخْتِيار مْصمّْـم
هندس ودقّق وحقّق ..وعْطيتك حْمـــاري
ــ
الله وليك ودمت بمودة وبكل خير
----------------------------
حتى راس ما خطاتو لولا
و همي من حبة ولا سبولة
الصابر ليه الله يا كاتب النفولا
الطالب ما يتحكم في سبوب ما يرسل الغولة
أنا رثيت لحالك و ماقويت غير نكول : مسكين
و كلامي ما يسرح طريق ما يفتح قفولا
------------------------------
همي من حبة ولا سبولة
واش بلا سبة سببت و السبوب نفولة
على الساروت قلبت صداو لي القفولة
و خير الكلام لا حولة
شكرا أخي الكريم على المرور

--------------------------------
العزيز قرميم سعيد

قد يعتقد من سيمر على هذا المتصفح أنك تجاوزت تعقيبي ولم ترد عليه ولكي لا يكون الأمر كذلك ، أرى من الصواب أن أنقل ردك من
"ركن ردود زجلية" إلى هنا حيث يجب أن يكون ...
------------------

وهذا ما جاء في ردك :
الرابط : http://matarmatar.net/vb/t8097-24/


أنا ليك مسلم و آنت قول الله أعلم مما نعلم
و كون عندي فلوس البارح و عقل اليوم كاع ما نندم
أخي الراقي طريقي طويلة و الحال علي ظلم
مابيدي حيلة و لازم نتأقلم
اليوم و في هاد الوقت راني نادم
و ساكن الكتابة غاب علي و الله ما عرفت ما نزمم
المهم أشكرك أخي على تفاعلك مع القصيدة و على ردودك و الله أبهرتني قرئتها و كررت قرائتها مرارا و دمعت عيني دموع ودم
********** ****** ****** ****** ****** ***** ***** *******
المهم الإجابة و الرد على الدواية و نشهد القلم
تحتي لكل المطريين
--------------------------