بانوا العيوب

بانوا العيوب

ألفرشي وخشي في الخروب



و با عروب مع أراب راب و ألهيب هوب

حجب و حجيبة و المحجوب

غارقين ذنوب و كل شي مزروب

قالوا ناس القلوب

اللي سبقونا غنينا ليهم غفهمونا

داروا بنادرهم و تبعونا

و قال مجذوب نا

هاداك حالهم العكر فوق الخنونا

ساكنة و مسكونة

و حجاية هاينة المجنونة

و الام الحنونة

و ها هنا كلنا

قاش قاش

القط و المشاش

و عايشة و عويشة

مولات الفرشة لالة مولات المرجة لالة

معمل الأفرشة -- مالها

العافية شعلات -- ناري

منافذ الإغاثة --- والو

ياو البيبان *** مسدودين

واو الشراجم ---- مطمقين

واو الطفاية ---- والو

واو العمال و العاملات -- كلشي تم --ناري

الدخان دار غمامة -- ميمتي

قامت القيامة --- أربي

العمى و الظلمة و كايتهامة على فرمة -- ماكاينش

وا مادا قالوا مادا دواو

و را الجثث زادوا قواوا

و بقاوا تم حتى تشواو واو الحيوط عليهم رابوا

وا بن معاشو سيدي سعيد

و الريحة فاتت السوالم وصلت البير الجديد

و عايشة قنديشة -- لالة

غلاء المعيشة -- كاينة

الحشيشة و الشيشة --- كاينة

و ديك الدريويشة -- مالها

عاكدة التغوبيشة -- وعلاش

خدامة فابور ---- معامن

قويدر و قادر و قدور --- فينهم

راهم في ماخور --- كاينة

و باش إخلصوا الخمور – باينة

النقص في الأجور -- و الخدام فابور

منوا خدام منو كلاس في الحمام و منو شيفور

الناس غادية القدام و حنا اللور اللور

و المطمور في مطمورة شفر و مخر و قمر و دفع الزمر يغامر مع الحوت الكبير في قاع البحر و طلبوا الله الستر